🌺श्री महालक्ष्मी देवीच्या त्रेवार्षिक यात्रेची महाप्रसादाने भक्तिमय सांगता!🌺

निपाणी नगरी वृत्तसेवा..(11)

“🌺 निपाणी श्री महालक्ष्मी देवीच्या त्रेवार्षिक यात्रेची महाप्रसादाने भक्तिमय वातावरणात सांगता झाली. नऊ दिवसांच्या धार्मिक सोहळ्यांला भाविकांचा उत्स्फूर्त प्रतिसाद मिळाला. शहरात भक्तीमय वातावरण अगदी नऊ दिवस जाणवत होते. 🌺”

निपाणी : येथील श्री महालक्ष्मी मंदिरात सुरू असलेल्या नऊ दिवसांच्या धार्मिक महोत्सवाची आज महाप्रसाद वितरणाने भक्तिमय आणि उत्साहपूर्ण वातावरणात यशस्वी सांगता झाली. दिनांक 3 फेब्रुवारी ते ११ फेब्रुवारी २०२६ दरम्यान विविध धार्मिक विधी, पूजाअर्चा, पालखी सोहळे, अभिषेक, हवन, भजन-कीर्तन आणि भव्य मिरवणुका मोठ्या भक्तिभावाने पार पडल्या.

महोत्सवाच्या कालावधीत सकाळी मुहूर्तमेढ व ध्वजारोहणाने कार्यक्रमाची सुरुवात झाली. त्यानंतर गणेश पूजन, संकल्प, नांदीश्राद्ध, विविध देवतांची पूजा, होम-हवन तसेच प्राणप्रतिष्ठा विधी पार पडले. देवीच्या मूर्तीचे आगमन व गोमाता वत्सासह कलश यात्रा मोठ्या उत्साहात काढण्यात आली. शहरातील प्रमुख मार्गांवरून निघालेल्या पालखी व शोभायात्रेला भाविकांचा उत्स्फूर्त प्रतिसाद लाभला. पालखी सोहळ्यात नगर प्रदक्षिणा करताना प्रत्येक घरासमोर रांगोळी काढून पालखीची पूजा करण्यात येत होती. कोठेवाली कॉर्नर येथे श्रीराम सेनेच्या वतीने सजीव देखावा करत वातावरण आणखीन भक्तीमय केले होते.

दररोज सकाळ-संध्याकाळ आरती, नेवैद्य, ओटी भरणे, अभिषेक पूजन, तसेच महिलांनी कलश घेऊन सहभाग नोंदविल्याने वातावरण अधिकच भक्तिमय झाले होते. कुमकुमार्चन, देवीचा गोंधळ आणि विविध धार्मिक कार्यक्रमांनी भक्तांची उपस्थिती लक्षणीय होती. नऊ दिवसाच्या भरगच्च कार्यक्रमांमध्ये सामाजिक, राजकीय, आर्थिक, साहित्य, कला, क्रीडा क्षेत्रातील विविध मान्यवरांनी श्री महालक्ष्मी देवीचे दर्शन घेत आशीर्वाद घेतले.

आज सकाळी 1 ते 4 या वेळेत गांधी चौक, निपाणी येथे भव्य महाप्रसाद वितरण सोहळा पार पडला. हजारो भाविकांनी महाप्रसादाचा लाभ घेत देवीचे दर्शन घेतले. या धार्मिक महोत्सवामुळे निपाणी शहरात भक्ती, श्रद्धा आणि ऐक्याचे वातावरण निर्माण झाले होते. सर्व भाविकांच्या सहकार्यामुळे कार्यक्रमाची यशस्वी सांगता झाल्याबद्दल मंदिर समितीने कृतज्ञता व्यक्त केली आहे.

नऊ दिवसाच्या भरगच्च कार्यक्रमास श्री महालक्ष्मी देवस्थान आणि अभिवृद्धी संघाचे अध्यक्ष आशिषभाई शाह, उपाध्यक्ष प्रशांत गुंडे यांच्यासह, गणेश नरके प्रसाद निर्मळे सुजित महाजन शुभम शेळके सौरभ जबडे संतोष दैव अजित पाटील राजू कोपर्डे श्रीशैल मेंडगुले ऋषिकेश मेंडगुले राहुल शिंदे सोनल दैव तुषार दैव विकी वैष्णव श्रेयश कानडे दीपक कुरणे प्रकाश मोहिते, यांच्यासह संपूर्ण कार्यक्रमाचे नियोजन मंदिर समिती व ग्रामस्थांच्या सहकार्याने शिस्तबद्धरीत्या पार पडले.