🔴 शिरगुप्पी रोड–निपाणी येथे सरळ ब्रिजसाठी नागरिक ठाम!

📍 निपाणी | दिनांक – 19 फेब्रुवारी 2026

🔴 “शिरगुप्पी रोड – निपाणी येथे सरळ ब्रिजसाठी ग्रामस्थांचा ठाम आवाज, प्रस्तावित बदलांना विरोध; नॅशनल हायवे ऑथॉरिटी व कंत्राटदार अधिकाऱ्यांकडे सुरक्षित वाहतुकीसाठी जोरदार मागणी“🔴

शिरगुप्पी रोड, निपाणी येथील नॅशनल हायवेवरील प्रस्तावित ब्रिज शिरगुप्पी रस्त्याकडून सरळ करण्यात यावा, या मागणीसाठी डोंगर ग्रामीण भागातील शिरगुप्पी, पांगिरे, अर्जुनी, बुदलमुख, गोंदुगुप्पी व शेंडुर तसेच हायवे पलीकडील ग्रामस्थांनी एकत्र येत तीव्र आंदोलन छेडले. नागरिकांच्या दैनंदिन प्रवासातील अडचणी लक्षात घेता सुरक्षित आणि सोयीस्कर वाहतुकीसाठी सरळ ब्रिज उभारण्याची मागणी यावेळी ठामपणे करण्यात आली.

यावेळी ग्रामस्थांनी नॅशनल हायवे ऑथॉरिटीचे व एस एम आवताडे कंपनीचे अधिकारी श्री. जगदीश पाटील व श्री. विजय दाइंगडे यांची प्रत्यक्ष भेट घेतली. प्रस्तावित बदलांमुळे नागरिकांना मोठा फेरा मारावा लागणार असून अपघाताचा धोका वाढू शकतो, अशी भीती त्यांनी व्यक्त केली. सर्व ग्रामस्थांच्या हिताचा विचार करून शिरगुप्पी रस्त्याकडून सरळ ब्रिज मंजूर करावा, अशी एकमुखी मागणी करण्यात आली.

या आंदोलनात निपाणी नगरपालिकेचे अनेक माजी नगरसेवक,‌ डोंगर भागातील सर्व ग्रामपंचायतीचे माजी अध्यक्ष, उपाध्यक्ष, सदस्य तसेच विविध गावांतील मान्यवर आणि नागरिक मोठ्या संख्येने उपस्थित होते. ग्रामस्थांच्या या एकजुटीमुळे प्रशासनाने सकारात्मक निर्णय घ्यावा, अशी अपेक्षा व्यक्त होत आहे.

थोडक्यात महत्त्वाचे..

शिरगुपी रोड ते निपाणी सरळ ब्रिज होण्यासाठी मागील पाच महिन्यापासून सर्वपक्षीय नेते एकत्र येऊन हायवे अधिकाऱ्यांना निवेदन देऊन सर्व प्रश्न मार्गी लागला होता. दरम्यान खरी कॉर्नर ब्रिज व या ब्रिजचे काम युद्ध पातळीवर चालू होते. अचानक कोणा राजकारण्यांची माशी शिंकली आणि परत सर्व सामान्य जनतेला रस्त्यावर उतरावं लागलं हे असे का घडले याची दिवसभर निपाणी व ग्रामीण परिसरात आवाजात चर्चा मात्र चालू होती.