निपाणी नगरी वृत्तसेवा..(18)
“32 वर्षांनी पुन्हा उजळल्या शाळेच्या आठवणी; म्युनिसिपल हायस्कूल निपाणी 1994-95 बॅचचा स्नेहमेळावा उत्साहात संपन्न झाला. गुरुजनांचा सन्मान, जुन्या मित्रमैत्रिणींच्या भेटीगाठी आणि आठवणींचा भावनिक संगम; स्नेहसंमेलनातून जपला मैत्री व संस्कारांचा अमूल्य ठेवा आहे.”..
आयुष्याच्या धावपळीमध्ये हरवलेल्या शाळेच्या आठवणींना पुन्हा एकदा उजाळा देत, म्युनिसिपल हायस्कूल निपाणीच्या 1994-95 बॅचच्या माजी विद्यार्थी-विद्यार्थिनींचा स्नेहमेळावा रविवारी (दि.17 मे 2026) वृंदावन गार्डन, गायकवाडी-निपाणी येथे अत्यंत उत्साह, आनंद आणि भावनिक वातावरणात संपन्न झाला. तब्बल 32 वर्षांनंतर बालपणीचे मित्र-मैत्रिणी, गुरुजन आणि आठवणी एकत्र आल्याने उपस्थितांच्या चेहऱ्यावर आनंद ओसंडून वाहत होता.
या स्नेहमेळाव्याचे आयोजन अभिलाषा जाधव, स्वरूपा कदम, प्रविण कुरणे, जय मुरगुडे, अमोल जाधव आणि विनायक सुळकुडे यांनी केले होते. कार्यक्रमासाठी जवळपास 100 विद्यार्थी-विद्यार्थिनी उपस्थित राहिले होते. अनेक जण वर्षानुवर्षांनी एकमेकांना भेटत असल्याने परिसरात आनंद, हशा आणि जुन्या आठवणींचा अनोखा संगम अनुभवायला मिळाला.
कार्यक्रमाची सुरुवात राष्ट्रगीताने करण्यात आली. त्यानंतर दिवंगत शिक्षक-शिक्षिका, विद्यार्थी तसेच त्यांच्या नातेवाईकांना श्रद्धांजली अर्पण करून भावपूर्ण आदर व्यक्त करण्यात आला.
या समारंभासाठी दुमाले मॅडम, नागांवकर सर, एस.आर. पाटील, एस.एल. पाटील, कुंभार सर, नंदकुमार निंबाळकर आणि वडणकर सर उपस्थित होते. 1994-95 च्या काळात या गुरुजनांनी विद्यार्थ्यांना दिलेले शिक्षण, संस्कार आणि मार्गदर्शन आजही विद्यार्थ्यांच्या मनात तितकेच जिवंत असल्याचे चित्र पाहायला मिळाले. विद्यार्थ्यांनी गुरुजनांविषयी कृतज्ञता व्यक्त करत त्यांचा सत्कार केला. गुरु-शिष्य नात्याची ऊब आणि आत्मीयता या प्रसंगी विशेष जाणवत होती.
यानंतर विद्यार्थी-विद्यार्थिनींची ओळख, मनोगत आणि आठवणींना उजाळा देणारे अनुभव मांडण्यात आले. अनेकांनी शाळेतील खोड्या, स्पर्धा, अभ्यासाचे दिवस आणि शिक्षकांचे मार्गदर्शन आठवत भावनिक भावना व्यक्त केल्या. “जीवनात आपण कितीही मोठे झालो तरी शाळेचे दिवस आणि शिक्षकांचे संस्कार कधीच विसरता येत नाहीत,” अशा भावना अनेकांनी व्यक्त केल्या.
दुमाले मॅडम यांनी सर्वांना भेटवस्तू देत विद्यार्थ्यांप्रती आपले प्रेम व्यक्त केले. गुरुजनांनीही विद्यार्थ्यांना एकजुटीने राहण्याचा, समाजासाठी कार्य करण्याचा आणि मैत्रीचे नाते कायम जपण्याचा संदेश दिला.
सहभोजनानंतर सुनिता चव्हाण यांनी विविध मनोरंजक खेळांचे आयोजन केले. जुन्या आठवणींमध्ये रमलेले विद्यार्थी पुन्हा एकदा शालेय जीवन अनुभवत असल्याचे चित्र पाहायला मिळाले. कार्यक्रमाची सांगता आयोजकांच्या हस्ते भेटवस्तू देऊन करण्यात आली.
स्नेहसंमेलन हे केवळ भेटीगाठींचे व्यासपीठ नसून, जुन्या नात्यांना नव्याने उजाळा देणारा आणि गुरुजनांविषयीचा आदर अधिक दृढ करणारा भावनिक सोहळा असल्याचे या कार्यक्रमातून अधोरेखित झाले.
About The Author
