🔴 तवंदी घाटात ढगफुटीसदृश मुसळधार पाऊस; पुणे-बंगळूर राष्ट्रीय महामार्गावरील वाहतूक विस्कळीत!

निपाणी नगरी वृत्तसेवा (7)

पुणे-बंगळूर राष्ट्रीय महामार्गावरील (NH-48) निपाणीनजीक असलेल्या तवंदी घाट परिसरात सलग दुसऱ्या दिवशी ढगफुटीसदृश मुसळधार पावसाने थैमान घातल्याने येथील जनजीवन विस्कळीत झाले आहे. डोंगरउतारावरून मोठ्या प्रमाणात चिखल, दगड आणि पाण्याचा प्रचंड प्रवाह थेट रस्त्यावर आल्यामुळे महामार्गाला अक्षरशः ओढ्याचे स्वरूप आले होते. अचानक निर्माण झालेल्या या परिस्थितीमुळे निपाणी-बेळगाव मार्गावरील वाहतूक काही काळासाठी पूर्णपणे ठप्प झाली होती.

घाटातील डोंगराचे अनियंत्रित उत्खनन आणि रस्त्याच्या कडेला योग्य गटारींची सोय नसल्याने हे पाणी महामार्गावर आले. महामार्गाच्या दोन्ही बाजूंना ३ ते ४ किलोमीटरपर्यंत वाहनांच्या लांबच लांब रांगा लागल्या होत्या. घटनेची माहिती मिळताच रस्ते देखभाल करणाऱ्या ‘अवताडे कंपनी’चे कर्मचारी आणि हायवे पोलीस जेसीबी (JCB) मशीनसह घटनास्थळी दाखल झाले. कर्मचाऱ्यांनी युद्धपातळीवर रस्त्यावरील चिखल आणि दगड बाजूला सारून एकेरी वाहतूक संथ गतीने सुरू केली. या पावसाने वाहनधारकांची मोठी तारांबळ उडाली असून, प्रशासनाने घाटात कायमस्वरूपी पाणी जाण्यासाठी मोठी गटारे बनवावीत, अशी मागणी स्थानिक नागरिकांकडून केली जात आहे.