🔴 डिजिटल पेमेंटचा नवा विक्रम; देशात ‘यूपीआय’ व्यवहारांचा ऐतिहासिक उच्चांक, ग्रामीण भागातही क्रांती!

निपाणी नगरी वृत्तसेवा (8)

देशात डिजिटल क्रांतीने आतापर्यंतचे सर्व जुने रेकॉर्ड मोडीत काढत एक नवा इतिहास रचला आहे. नॅशनल पेमेंट्स कॉर्पोरेशन ऑफ इंडिया (NPCI) ने जाहीर केलेल्या ताज्या अधिकृत आकडेवारीनुसार, एकट्या मे २०२६ या महिन्यात देशात २३.२० अब्ज (२३.२० बिलियन) यूपीआय व्यवहार झाले आहेत. या व्यवहारांचे एकूण मूल्य तब्बल २९.९ लाख कोटी रुपये इतके प्रचंड आहे. म्हणजेच देशात दररोज सरासरी ७३ कोटी ७७ लाख ऑनलाईन व्यवहार होत आहेत, ज्यांचे दैनंदिन मूल्य ८४,४२३ कोटी रुपये आहे.

इंटरनेटचा वाढता विस्तार आणि स्मार्टफोनची उपलब्धता यामुळे देशातील आर्थिक व्यवहार पूर्णपणे बदलले आहेत. विशेष म्हणजे, हा बदल केवळ मुंबई, दिल्लीसारख्या मेट्रो शहरांपुरता मर्यादित राहिलेला नाही. निपाणी, गडहिंग्लज, चिक्कोडी यांसारख्या निमशहरी आणि ग्रामीण भागातील बाजारपेठांमध्येही डिजिटल पेमेंटचा टक्का कमालीचा वाढला आहे. तुलनेत, बँकेच्या पारंपरिक आयएमपीएस (IMPS) प्रणालीद्वारे या महिन्यात केवळ ३५ कोटी ८१ लाख व्यवहार झाले. रिझर्व्ह बँकेच्या अहवालानुसार, ग्रामीण भागात रोकड विरहित (Cashless) व्यवहारांचे प्रमाण वाढल्यामुळे बँकिंग व्यवस्थेला कमालीची गती मिळाली असून, यामुळे बाजारपेठेत कमालीची पारदर्शकता येत आहे.