🎶 निपाणीतील संगीत प्रेमींसाठी पर्वणी! आज अविष्कार सांस्कृतिक अकॅडमीकडून ‘स्वररंग’ मैफलीचे आयोजन

🎶 निपाणी नगरी वृत्तसेवा..(31)

निपाणी शहरातील सांस्कृतिक चळवळीला सातत्याने चालना देणाऱ्या अविष्कार सांस्कृतिक अकॅडमी, निपाणी यांच्या वतीने सुरेल संगीताचा मेळ घालणारी ‘स्वररंग’ ही खास मैफल आयोजित करण्यात आली आहे. मराठी भावसंगीत, हिंदी-मराठी चित्रपट गीते तसेच लोकप्रिय गीतांचा सुरेल संगम या कार्यक्रमातून रसिकांना अनुभवता येणार आहे.

या संगीत मैफलीत कलर्स मराठी वाहिनीवरील गाजलेली संगीत मैफील “सुर नवा ध्यास नवा” ची सुप्रसिद्ध गायिका अंतरा कुलकर्णी आपल्या मधुर आवाजातून श्रोत्यांना मंत्रमुग्ध करणार आहेत. “स्वररंग” या संकल्पनेतून संगीताच्या विविध छटा, भावभावना आणि सुरांची रंगत रसिकांसमोर उलगडली जाणार आहे.

अविष्कार सांस्कृतिक अकॅडमी ही संस्था गेल्या अनेक वर्षांपासून निपाणी व परिसरात सांस्कृतिक, कलात्मक व संगीतविषयक उपक्रम राबवत असून नवोदित कलाकारांना व्यासपीठ मिळवून देणे, अभिजात व लोकप्रिय संगीताची आवड जोपासणे हे संस्थेचे प्रमुख उद्दिष्ट आहे. ‘स्वररंग’सारख्या कार्यक्रमातून संगीतप्रेमीं साठी दर्जेदार व दर्जात्मक कार्यक्रम सादर करण्याची परंपरा अविष्कारने जपली आहे.

संगीताची आवड असणाऱ्या प्रत्येक रसिकासाठी हा कार्यक्रम खास ठरणार असून, गायन, सूर, ताल आणि भावनांचा सुंदर मिलाफ अनुभवण्याची संधी या मैफलीत मिळणार आहे. विशेष म्हणजे सर्व अविष्कार सभासद रसिकांसाठी मोफत प्रवेश ठेवण्यात आला आहे.

हा कार्यक्रम शनिवार, ३१ जानेवारी २०२६ रोजी सायंकाळी ६.३० ते ९.३० या वेळेत, श्री व्यंकटेश मंदिर, गांधी चौक, निपाणी येथे आयोजित करण्यात आला आहे. निपाणीतील व परिसरातील संगीत प्रेमींनी या सुरेल मैफलीचा लाभ घ्यावा, असे आवाहन आयोजकांच्या वतीने करण्यात आले आहे.