🟣 मळगे खुर्द (ता.कागल) येथे 7 ते 14 एप्रिल दरम्यान अखंड हरिनाम सप्ताहाचे आयोजन!

🟣 निपाणी नगरी वृत्तसेवा (7)

कागल तालुक्यातील मळगे खुर्द येथे श्री विठ्ठल भजनी मंडळ, मळगे खुर्द यांच्या वतीने अखंड हरिनाम सप्ताह व ग्रंथराज श्री ज्ञानेश्वरी पारायण सोहळ्याचे आयोजन करण्यात आले आहे. हा भव्य धार्मिक सोहळा मंगळवार दि. 07/04/2026 ते मंगळवार दि. 14/04/2026 या कालावधीत पार पडणार असून, परिसरातील भाविकांसाठी ही एक मोठी आध्यात्मिक पर्वणी ठरणार आहे.

हरिनाम सप्ताहाची सुरुवात दि. 7 रोजी सकाळी 9 वाजता ध्वजारोहण, दीपप्रज्वलन व वीणा पूजनाने होणार आहे. त्यानंतर दररोज पहाटे काकडा आरती, सकाळी भजन व ज्ञानेश्वरी पारायण, दुपारी हरिपाठ, सायंकाळी प्रवचन आणि रात्री कीर्तन व हरिजागर असे विविध धार्मिक कार्यक्रम नियोजित करण्यात आले आहेत. सप्ताहात विविध मान्यवर ह.भ.प. प्रवचनकार व कीर्तनकार उपस्थित राहून भक्तांना मार्गदर्शन करणार आहेत.

कार्यक्रमात प्रत्येक दिवशी वेगवेगळ्या मान्यवरांच्या हस्ते अल्पोपहार व पारायण सेवांचे आयोजन करण्यात आले असून, सायंकाळच्या आरतीचे मानही विविध भक्तांना देण्यात आले आहेत. तसेच वीणा पाहारा देण्याची परंपरा जपली जाणार आहे, ही या सप्ताहाची विशेष बाब ठरणार आहे.

मंगळवार दि. 14 रोजी सकाळी 9 ते 12 या वेळेत ह.भ.प. अर्जुन जाधव यांचे काल्याचे कीर्तन होणार असून, त्यानंतर महाप्रसादाचे आयोजन करण्यात आले आहे. दुपारी सुमारे ३ वाजता दही-हंडी भंडारा आयोजित करण्यात येणार असून, या कार्यक्रमासाठी अनेक देणगीदारांनी उदार सहकार्य दिले आहे.

या सप्ताहासाठी मंडप, लाईट फिटिंग, पाणी व्यवस्था, प्रसाद व्यवस्था तसेच विविध सेवा ग्रामस्थांच्या सहकार्याने उभारण्यात आल्या आहेत. गावातील सर्व तरुण मंडळे, महिला व ज्येष्ठ नागरिक मोठ्या उत्साहाने या सोहळ्यात सहभागी होत आहेत.

या पवित्र सप्ताहात सर्व भाविकांनी उपस्थित राहून हरिनामाचा लाभ घ्यावा, असे आवाहन श्री विठ्ठल भजनी मंडळ, श्री विठ्ठल रुक्मिणी भजनी मंडळ व समस्त ग्रामस्थ, मळगे खुर्द यांच्या वतीने करण्यात आले आहे.