🚀 मोहनलाल दोशी विद्यालयाच्या शर्वरीची इस्रो सहलीसाठी अभिमानास्पद निवड!

निपाणी नगरी वृत्तसेवा (19)

ज्ञानाची ओढ, परिश्रमाची साथ आणि स्वप्नांच्या दिशेने झेप घेण्याची जिद्द—याच त्रिसूत्रीच्या बळावर एम.डी. विद्यालयाची कुशाग्र विद्यार्थिनी कु. शर्वरी अभिजीत पाटील हिने अभिमानास्पद यश संपादन करत थेट इस्रो सहलीसाठी निवड मिळवली आहे.

आठवी शिष्यवृत्ती परीक्षेच्या राज्य गुणवत्ता यादीत (State Merit List) स्थान पटकावत शर्वरीने आपल्या बुद्धिमत्तेची व कर्तृत्वाची झळाळी सिद्ध केली आहे. या उल्लेखनीय यशाच्या जोरावर तिची निवड थेट Indian Space Research Organisation (ISRO) च्या शैक्षणिक सहलीसाठी होणे, ही एम.डी. विद्यालयासाठी तसेच संपूर्ण परिसरासाठी अभिमानाची बाब ठरली आहे.

शर्वरीच्या या यशामागे संस्थेचे प्रेरणास्थान अध्यक्ष आशिषभाई शाह, उपाध्यक्षा डॉ. प्रतिभाभाभी शाह व डॉ. सौ. तृप्तीभाभी शाह यांचे मार्गदर्शन लाभले. तसेच मुख्याध्यापिका श्रीमती एस. एम. गोडबोले, सर्व शिक्षकवृंद, शिक्षकेतर कर्मचारी व पालकांचे मोलाचे सहकार्यही तिच्या यशामध्ये महत्त्वपूर्ण ठरले आहे.

आजच्या स्पर्धात्मक युगात ग्रामीण भागातील विद्यार्थिनीने अशी उंच भरारी घेणे, हे इतर विद्यार्थ्यांसाठी प्रेरणादायी उदाहरण ठरत आहे. मेहनत, चिकाटी आणि योग्य मार्गदर्शन यांच्या जोरावर कोणतेही स्वप्न अशक्य नाही, हे शर्वरीने आपल्या यशातून दाखवून दिले आहे.

“इस्रोच्या दारी पोहोचली आपल्या शाळेची शान, तिच्या यशाने वाढला आई-वडिलांचा अभिमान…!” 🚀 शर्वरीच्या उज्ज्वल भविष्यासाठी सर्व स्तरांतून तिच्यावर शुभेच्छांचा वर्षाव होत आहे. 🌟