🚩बालमनात रुजली विठ्ठलभक्ती, अंकुरम इंग्लिश मिडीयम शाळेतील आषाढी एकादशीचा दिंडी सोहळा भक्तिमय वातावरणात संपन्न! 🚩

निपाणी नगरी वृत्तसेवा (27)

आषाढी एकादशी हा केवळ एक धार्मिक सण नसून, तो महाराष्ट्राच्या संतपरंपरेचा, संस्कृतीचा आणि भक्तीचा अखंड प्रवाह आहे. संत ज्ञानेश्वर, संत तुकाराम आणि असंख्य वारकऱ्यांनी जपलेली विठ्ठलभक्ती आजच्या नव्या पिढीपर्यंत पोहोचविण्याचे मोलाचे कार्य अंकूरम शाळा करत आहे.

अंकुरम इंग्लिश मिडीयम शाळेत शाळेच्या कर्तव्यदक्ष प्राचार्या सौ. चेतना चौगुले यांच्या मार्गदर्शनाखाली आषाढी एकादशीच्या निमित्ताने लहान मुलांची भव्य पालखी दिंडी आणि रिंगण सोहळा अत्यंत भक्तिमय वातावरणात संपन्न झाला.

कार्यक्रमाच्या प्रारंभी लहानग्या विद्यार्थ्यांच्या शुभहस्ते श्री विठ्ठलाच्या पालखीचे पूजन करण्यात आले. निष्पाप बालहातांनी केलेले हे पूजन पाहून उपस्थितांच्या मनात भक्ती आणि समाधानाची भावना दाटून आली. त्यानंतर टाळ, मृदुंग आणि विठ्ठल नामाच्या अखंड गजरात पालखी दिंडीला प्रारंभ झाला.

या दिंडी सोहळ्यात विद्यार्थ्यांनी संत परंपरेतील विविध भूमिका साकारत सर्वांचे लक्ष वेधून घेतले. कोणी श्री विठ्ठलाच्या, कोणी माता रुक्मिणीच्या, तर कोणी संत ज्ञानेश्वर माऊली, संत तुकाराम महाराज यांच्या वेशभूषेत सहभागी झाले होते. त्यांच्या चेहऱ्यावरील निरागस भाव, हातात भगवे झेंडे, टाळ मृदुंगाचा नाद आणि मुखातून घुमणारा “ज्ञानोबा-तुकाराम पांडुरंग हरी जय जय राम कृष्ण हरी ” हा नामघोष संपूर्ण परिसराला अक्षरशः पंढरीचे रूप देत होता.

यानंतर पार पडलेल्या रिंगण सोहळ्याने कार्यक्रमाची शोभा आणखी खुलवली. लहानग्यांचा उत्साह, त्यांची भक्ती आणि संत परंपरेबद्दलचा आदर पाहून उपस्थित प्रत्येकजण भारावून गेला. हा केवळ सांस्कृतिक कार्यक्रम नव्हता, तर विद्यार्थ्यांच्या मनात संस्कार, श्रद्धा, एकोपा आणि आपल्या समृद्ध वारसा या विषयी अभिमान निर्माण करणारा एक सुंदर उपक्रम ठरला.

या अविस्मरणीय सोहळ्याच्या यशस्वी आयोजना मागे शाळेच्या प्राचार्या सौ. चेतना चौगुले यांचे प्रेरणादायी मार्गदर्शन आणि सर्व शिक्षक तसेच शिक्षकेतर कर्मचाऱ्यांचे परिश्रम मोलाचे ठरले.

विद्यार्थ्यांना आधुनिक शिक्षणाबरोबरच भारतीय संस्कृती, संतपरंपरा आणि नैतिक मूल्यांची ओळख करून देण्याचा त्यांचा प्रयत्न निश्चितच कौतुकास्पद आहे.

अशा उपक्रमांमधून मुलांच्या कोवळ्या मनात भक्ती, संस्कार, शिस्त, एकात्मता आणि समाजा विषयीची जाणीव रुजते. उद्याचा सुसंस्कृत, संवेदनशील आणि मूल्यनिष्ठ नागरिक घडविण्याचे कार्य अशाच संस्कारमय कार्यक्रमांतून घडत असते.