निपाणी नगरी वृत्तसेवा (7)
देशांतर्गत बाजारपेठेत सध्या महागाईने एवढा उच्चांक गाठला आहे की, सर्वसामान्य आणि गरीब कुटुंबांनी रोजचा उदरनिर्वाह कसा करावा, हा एक यक्षप्रश्न बनला आहे. भाजीपाल्यापासून ते रोजच्या किराणा मालापर्यंत आणि गॅस सिलिंडरपासून ते मुलांच्या शालेय साहित्यापर्यंत प्रत्येक गोष्टीचे भाव गगनाला भिडले आहेत. आश्चर्याची गोष्ट म्हणजे, बाजारात वस्तूंचे भाव ज्या गतीने वाढत आहेत, त्या गतीने सामान्य माणसाचे उत्पन्न मात्र वाढायला तयार नाही. स्थिर उत्पन्न आणि गगनाला भिडणारा खर्च या दुष्टचक्रात मध्यमवर्गीय माणूस पुरता भरडला जात आहे.
सत्तेत बसलेले नेते आणि अधिकारी मात्र नेहमीच महागाई नियंत्रणात असल्याचे दावे करत आकडेवारीचे खेळ मांडत असतात. परंतु, प्रत्यक्षात गृहिणींचे गृहबजेट पार कोलमडून गेले आहे. महिन्याचा पगार हातामध्ये येण्यापूर्वीच तो कुठे खर्च करायचा, या चिंतेने सामान्य नागरिक हवालदिल झाला आहे. महागाईच्या या भीषण माऱ्यामुळे सणासुदीचा आनंद देखील हिरावला गेला आहे. सरकारने केवळ मोठ्या उद्योगपतींच्या हिताचे निर्णय न घेता, देशातील ९० टक्के असलेल्या सामान्य आणि गरीब जनतेचा विचार करणे गरजेचे आहे. जीवनावश्यक वस्तूंचे भाव तातडीने नियंत्रणात आणून सर्वसामान्यांना दिलासा देणारी ठोस पावले उचलली गेली नाहीत, तर जनतेच्या मनात निर्माण झालेला हा तीव्र असंतोष कोणत्याही क्षणी उद्रेकाचे रूप घेऊ शकतो.
About The Author
