🟣 महापुरुषांच्या विचारांतून परिवर्तनाचा संदेश; कराडमध्ये राज्यस्तरीय पुरस्कार सोहळा संपन्न- डॉ. राजश्री तुडयेकर यांचे प्रतिपादन!

📍 निपाणी नगरी वृत्तसेवा कराड (प्रतिनिधी) दि. 19

कराड येथील वेणूताई चव्हाण स्मारक येथे स्वामी विवेकानंद सोशल फाउंडेशन महाराष्ट्र राज्य तसेच संवाद फाउंडेशन यांच्या संयुक्त विद्यमाने डॉ. बाबासाहेब आंबेडकर यांच्या १३५ व्या जयंतीनिमित्त भव्य कार्यक्रम उत्साहात पार पडला. यावेळी राज्यस्तरीय पुरस्कार सन्मान सोहळ्याचे आयोजन करण्यात आले होते.

कार्यक्रमाच्या अध्यक्षस्थानी राजश्री ॲग्रीवेंचर कंपनीच्या एम.डी. डॉ. राजश्री तुडयेकर या होत्या. अध्यक्षीय भाषणात त्या म्हणाल्या की, “महापुरुषांचे विचार हाच खरा परिवर्तनाचा राजमार्ग आहे. देशाला दिशा देणारे आणि समाजाला उन्नतीकडे नेणारे विचार केवळ महापुरुषच देऊ शकतात. त्या विचारांचा वारसा जपणे ही काळाची गरज आहे.” आजच्या आधुनिक युगात महापुरुषांच्या विचारांची शिदोरी जपत त्यांचा वारसा पुढे नेणे आजच्या पिढीचे प्रथम कर्तव्य आहे. व ते आत्मसात केल्याशिवाय आजचा आधुनिक समाज उन्नतीकडे जाणे निव्वळ अशक्य आहे. पण अवघड मुळीच नाही असे अनमोल विचार सौ तुडयेकर यांनी आपल्या अध्यक्षीय भाषणात काढले. त्यांनी संस्थेच्या कार्याचा आढावा घेत त्यांना देखील भविष्यातील आधुनिक युगाची पावली ओळखत मार्गक्रमण करण्याचे आवाहन केले. व संस्थेच्या वर्तमानातील कार्याचेही तोंडभरून कौतुकही केले.

यावेळी समतावादी महासंघाचे संस्थापक डॉ. विजय चांदणे यांनी आपल्या मनोगतातून सामाजिक समतेचा संदेश दिला. कार्यक्रमास प्रा. बोडरे सर, प्रवीण भोसले, विद्याधर गायकवाड यांच्यासह ‘रुबाब’ चित्रपटातील अभिनेत्री प्रतीक्षा जाधव, ‘मीरा’ चित्रपटातील अभिनेत्री वैष्णवी काळे, ज्येष्ठ समाजसेवक राजाराम गुरव, राज्य सल्लागार सुनील फाटक, राज्य उपाध्यक्ष प्रतिश चोपडे, जिल्हाध्यक्ष प्रकाश दणाणे, विजया माने, अनिल पोळ आदी मान्यवर उपस्थित होते.

या सोहळ्यात कला, क्रीडा, कृषी, सामाजिक व वैद्यकीय क्षेत्रात उल्लेखनीय कार्य करणाऱ्या मान्यवरांचा राज्यस्तरीय पुरस्काराने गौरव करण्यात आला. कार्यक्रमाच्या शेवटी संस्थेचे सल्लागार सुनील फाटक यांनी उपस्थितांचे आभार मानले.