देवचंद महाविद्यालयातील रसायनशास्त्र विभागाचे यश; ५ विद्यार्थ्यांची ‘रॉस लाईफ सायन्स’मध्ये निवड!

निपाणी नगरी वृत्तसेवा (5)

“देवचंद महाविद्यालयातील रसायनशास्त्र विभागाचे यश; ५ विद्यार्थ्यांची ‘रॉस लाईफ सायन्स’मध्ये निवड, कॅम्पस इंटरव्ह्यूद्वारे विद्यार्थ्यांना थेट रोजगार संधी; उद्योगाभिमुख शिक्षणामुळे यशाची नवी दिशा देत रसायनशास्त्र (Chemistry) विभाग विद्यार्थ्यांच्या करिअर घडविण्यासाठी सातत्याने पुढाकार घेत असल्याचे पुन्हा एकदा स्पष्ट झाले आहे.”

आजच्या स्पर्धात्मक युगात केवळ पदवीपुरते शिक्षण पुरेसे न राहता, उद्योगजगताशी थेट जोडणाऱ्या कॅम्पस इंटरव्ह्यूंचे महत्त्व दिवसेंदिवस वाढत आहे. विद्यार्थ्यांना शिक्षणाबरोबरच रोजगाराच्या संधी मिळाव्यात, यासाठी महाविद्यालयांनी उद्योगक्षेत्राशी सातत्याने संपर्क ठेवणे गरजेचे बनले आहे. अशा पार्श्वभूमीवर देवचंद महाविद्यालयाचा रसायनशास्त्र (Chemistry) विभाग विद्यार्थ्यांच्या करिअर घडविण्यासाठी सातत्याने पुढाकार घेत असल्याचे पुन्हा एकदा स्पष्ट झाले आहे.

येथील देवचंद महाविद्यालय रसायनशास्त्र विभागाच्या वतीने आयोजित कॅम्पस इंटरव्ह्यूमध्ये ५ विद्यार्थ्यांची यशस्वी निवड करण्यात आली. पुण्यातील नामांकित ‘रॉस लाईफ सायन्स लिमिटेड, भोसरी’ येथील कंपनीने या प्रक्रियेत सहभाग घेतला होता. या प्रसंगी कंपनीचे अधिकारी मिस स्मृती जुमळे (VP, HR), मि. तानाजी पावले (VP, Customer Relationship), मि. बबलू चव्हाण (HOD, Products Chemistry) आणि मि. कुलभूषण जाधव (HOD, Residue Chemistry) उपस्थित होते.

रसायनशास्त्र विभागाने विद्यार्थ्यांना केवळ सैद्धांतिक ज्ञान न देता प्रयोगशाळा कौशल्य, संशोधनवृत्ती आणि उद्योगाभिमुख प्रशिक्षण देण्यावर विशेष भर दिला आहे. त्यामुळेच अशा नामांकित कंपन्या महाविद्यालयात येऊन थेट निवड प्रक्रिया राबवित असल्याचे दिसून येते. विद्यार्थ्यांच्या सर्वांगीण विकासासाठी हा विभाग सातत्याने प्रयत्नशील असून, भविष्यातही अशाच संधी उपलब्ध करून देण्याचा प्रयत्न केला जाणार आहे.

यावेळी महाविद्यालयाच्या प्राचार्या प्रो. डॉ. जी. डी. इंगळे यांनी पाहुण्यांचे स्वागत केले, तर प्रो. डॉ. अविनाश रामटेके यांनी प्रास्ताविक केले. एम.एस्सी. द्वितीय वर्षातील एकूण १४ विद्यार्थ्यांनी लेखी परीक्षा दिली. त्यातून निवडक विद्यार्थ्यांच्या मुलाखती घेऊन अंतिम ५ जणांची नियुक्ती करण्यात आली.

या यशाबद्दल जनता शिक्षण मंडळाचे अध्यक्ष आशिषभाई शाह, उपाध्यक्ष डॉ. सौ. तृप्तीभाभी शाह आणि रसायनशास्त्र विभाग प्रमुख प्रो. डॉ. सविता धोंगडे देसाई यांनी विद्यार्थ्यांचे अभिनंदन केले. कार्यक्रम यशस्वी करण्यासाठी डॉ. संदीप केनवडे, डॉ. संदीप पाटील व मिस रेश्मा धुमाळ यांनी परिश्रम घेतले.