संतोष भेगडे फाउंडेशनचा स्तुत्य उपक्रम; गणेशमूर्तींचे संकलन व विधीवत विसर्जन करणार
तळेगाव : नगरसेवक संतोष भेगडे यांच्या फाउंडेशनच्या वतीने तळेगाव शहरात स्तुत्य उपक्रम राबवण्यात येणार आहे. गुरुवार (दि. 16 सप्टेंबर) रोजी शहरातील विविध भागातून गणेशमूर्ती व निर्माल्य संकलन करून भक्तीभावाने विधिवत विसर्जन करण्यात येणार आहे.
शहरातील सात विभागांमधून दुपारी 12 ते 4 या वेळेत फाउंडेशनच्या कार्यकर्त्यांच्या माध्यमातून सोसायटी किंवा घराजवळून गणेशमूर्तींचे संकलन करण्यात येणार आहे.10 ट्रॅक्टर, 12 टेम्पो,3 पिकप अशा एकूण 25 गाड्यांमध्ये गणेशमूर्ती संकलन करण्यात येईल.
प्रशासनाने नदीपात्रात व तलावांमध्ये गणेशमूर्ती विसर्जन करण्यासाठी बंदी केल्याने हा उपक्रम राबविला जात आहे. सर्व गणेशभक्तांनी आपल्या घरातील गणेशमूर्ती विसर्जनासाठी संपर्क करावा असे आवाहन फाउंडेशनच्यावतीने नगरसेवक संतोष भेगडे यांनी केले आहे.